وظائف من المنزل

بتشتغلي إيه ؟؟ بشتغل عالنت !!!

أنا سيدة أعمل من خلال الانترنت طبعا انتوا عارفين ان كتير من الناس فى وقتنا دا لسه ميعرفوش يعنى اى عمل من خلال الانترنت ولو إتكلمت معاهم في الموضوع ممكن يعتبروه خيال علمي وفي ناس يسمعوا عنه بس عمرهم ما جربوه او ميعرفوش تفاصيل كتير عنه ...

أنا حبيت أقدم المقال في صورة حوار بين شخصين لأنى حسيت إن الإستفادة هتكون أكبر ودا نفس السبب اللى خلاني أكتبه بالعامية المصرية حواري هيكون بين شخص بيشتغل من خلال الانترنت وشخص تانى مسمعش عن العمل دا قبل كدا واخترت ان الشخص دا يكون الام عشان كتير من ابائنا وامهاتنا ميعرفوش عنه وبيكون صعب نقنعهم بيه ...

الأم :        إنتي بأه سيبتي شغلك من وقت ما اتجوزتي ، مش ناوية تنزلي شغل تاني؟

البنــت :    مانا بشتغل يا ماما من فترة .

الأم :       بتشتغلي فين بأه أنا ولا سمعت إن إنتي نزلتي شغل ولا رحتي عملتي إنترفيو ، وبعدين بتودي إبنك فين ؟؟

البنـت:    لا ياماما أنا بشتغل من النت وعملت الإنترفيو كمان عالنت .

الأم:       بتشتغلي عالنت ؟ إزاي يعني ؟

البنـت:   يعني بستلم الشغل عالنت من خلال الميل مثلا وبعمله على النت أو على الكمبيوتر وبعدين بسلمه لصاحب الشغل .

الأم :     أه يعنى بتشتغلي إيه برضه ؟؟

البنـت:   حاجات كتير يا ماما مش شغالة في تخصص معين يعني ممكن مرة مديرة موقع , مرة تانية مدخلة بيانات ، ساعات أصمم حاجات بالفوتوشوب .

الأم:     طب واالشغل دا بتقبضي فلوسه إزاي ؟

البنـت:   في وسائل كتيره لإرسال وتسلم الفلوس .. مثلا هنا في مصر ممكن بالبريد أو بخدمة كاش اللي موفراها كذا شركة أو ممكن عن طريق شركة تحويل أموال لو الفلوس هتيجي من عميل في بلد تانية أو عن طريق تحويل بنكي دا كمان في حاجه اسمها بنوك الكترونية بس دى مختلفة شوية .

الأم:     طب وإنتي بتضمني فلوسك إزاي؟ ما إنتي ممكن تشتغلي وتسلمي الشغل وبعدين ميدفعش .

البنـت:  والله أنا عن نفسي جربت وكام مرة تصيب ومرة تخيب لحد ما بأة عندي ناس ثقة بتعامل معاهم وممكن الناس دول يعرفوني على عملا جداد دا غير إن في مواقع توظيف من خلال الإنترنت بتكون وسيط بين صاحب العمل والقائم بالعمل وهي اللي بتضمن حق الإتنين يعنى نظام سلم واستلم .

الأم :    بس الشركات اللي زينا مش بتستفيد من الشغل دا مش هنحتاجه في حاجه .

البنـت:  لا إزاي بأه يا ماما إنتي لو عرفتي الموضوع كويس هتستفيدي أوي منه يعني مثلا الشركة اللي إنتي فيها لو محتاجة برنامج ممكن بدل ما تستعينوا بشركة برمجة تطلبو شخص من خلال الإنترنت يعمله دا غير كمان إن شركات البرمجة نفسها بتستعين بمبرمجين من خلال الإنترنت يساعدوا المبرمجين اللي عندهم فس الشركة في بعض البرامج بدل ما يعينوا ناس جداد في وقت زنقة الشغل وبعدين يلاقوا نفسهم بعد كدا مش محتاجينهم وبيدفعوا مرتبات عالفاضي ، دكاترة الجامعة مثلا بيستعينوا بناس من الإنترنت يكتبوا ليهم الكتب على الكمبيوتر أو يساعدوهم في بعض الأبحاث أو في الترجمة بدل ما يضيعوا وقتهم في حاجات مش في صميم عملهم ،، وحاجات تانية كتييييير جدا يعني من الأخر العمل من خلال الإنترنت بيساعد شركات وأفراد كتير بمختلف مجالات عملهم وزي ما إنتي قلتي في الأول انا مش بسيب أولادي وأنزل في نفس الوقت بشتغل .

الأم :  سبحان الله الدنيا إتغيرت أوي ,, ربنا يوفقك يابنتي. 

بقلم : ولاء عيد